"त्या" ३३ वर्षीय युवकाच्या खूनप्रकरणी पोलिसांचा दणका!
प्रतिनिधी : अशोक इंगोले, हिंगोली
हिंगोली : वसमत शहरातील एरिगेशन कॅम्प परिसरातील जुन्या पडीत रेस्ट हाऊसच्या खोलीत ३३ वर्षीय युवकाचा मृतदेह आढळून आल्याने खळबळ उडाली होती. अभिजीत रत्नाकर शहाणे (वय ३३, रा. सुवर्णाकार कॉलनी, मालेगाव रोड, वसमत) असे मृत युवकाचे नाव आहे. त्यांच्या डोक्यात दगडाने मारहाण करून हत्या झाल्याचा संशय व्यक्त करण्यात आला होता. या प्रकरणी अज्ञात व्यक्तीविरुद्ध वसमत शहर पोलीस ठाण्यात खुनाचा गुन्हा दाखल करण्यात आला होता.
तपासादरम्यान पोलिसांनी या प्रकरणात तीन संशयित आरोपींना अटक केली असून, त्यांना न्यायालयासमोर हजर करण्याची प्रक्रिया सुरू आहे.
पोलिसांच्या नोंदीनुसार, दि. १७ सप्टेंबर रोजी दुपारी १२.३० वाजेपासून दि. १८ सप्टेंबर रोजी दुपारी २.३५ वाजेपर्यंतच्या कालावधीत ही घटना घडल्याचे नमूद आहे.
मृतकाचे मामा संजय प्रभाकर टाक यांच्या फिर्यादीवरून वसमत शहर पोलीस ठाण्यात गुन्हा क्रमांक ०५८५/२०२६ दाखल करण्यात आला असून, भारतीय न्याय संहिता, २०२३ मधील कलम १०३(१) अन्वये गुन्हा नोंदविण्यात आला आहे.
तीन संशयित आरोपी अटकेत
जिल्हा पोलीस अधीक्षक श्रेणिक लोढा, अपर पोलीस अधीक्षक कमलेश मीना, उपविभागीय पोलीस अधिकारी राजकुमार केंद्रे आणि पोलीस निरीक्षक सुधीर वाघ यांच्या मार्गदर्शनाखाली पोलिसांनी तपासाला वेग दिला.
या तपासात जय पिता सुनील थोरात (वय १९, व्यवसाय मजुरी, रा. आंबेडकरनगर, वसमत), गुलफराज गुलशर पठाण (वय ३०, व्यवसाय मजुरी, रा. एकतानगर, सेलू, जि. परभणी; हल्ली रा. गौतमनगर, वसमत) आणि रामेश्वर रमेश अडसुळे (वय १९, व्यवसाय मजुरी, रा. आंबेडकरनगर, वसमत) या तिघांना अटक करण्यात आली आहे.
अटक करण्यात आलेल्या तिन्ही संशयित आरोपींना न्यायालयासमोर हजर करण्याची प्रक्रिया सुरू असल्याचे पोलिसांनी सांगितले.
खुनामागील कारणाचा तपास सुरू
अभिजीत शहाणे यांच्या डोक्यात दगडाने मारहाण झाल्याचे फिर्यादीत नमूद आहे. मात्र, या खुनामागील नेमके कारण काय होते, याबाबत अद्याप अधिकृत निष्कर्ष समोर आलेला नाही.
अटक करण्यात आलेल्या संशयित आरोपींची चौकशी सुरू असून, घटनेमागील कारण आणि इतर बाबींचा तपास करण्यात येत आहे, अशी माहिती तपास अधिकारी सहायक पोलीस निरीक्षक एस. बी. डेडवाल यांनी दिली.
सुरुवातीला या प्रकरणात अज्ञात आरोपीविरुद्ध गुन्हा दाखल करण्यात आला होता. तपासादरम्यान तीन संशयित आरोपी निष्पन्न होऊन त्यांना अटक करण्यात आली आहे. पुढील तपास वसमत शहर पोलीस करीत आहेत.
