झाशी राणी चौकात बॅनर लावताना युवकाला करंट : गंभीर जखमी
प्रतिनिधी:मोहम्मद नासीर चंद्रपूर
बल्लारपूर : शहरातील झाशी राणी चौक येथे आज सकाळी सुमारे १०.१५ वाजताच्या सुमारास एका उमेदवाराच्या प्रचारासाठी विद्युत खांबावर बॅनर लावताना करंट लागून युवक गंभीर जखमी झाल्याची घटना घडली. तेजन सूर्यकांत टोंगे (वय २० वर्ष) असे जखमी युवकाचे नाव आहे.
मिळालेल्या माहितीनुसार, तेजन हा विद्युत खांबावर चढून बॅनर बांधत असताना अचानक त्याला विजेचा जोरदार धक्का बसला. विजेचा झटका बसताच तो खाली कोसळला. पडताना त्याच्या डोक्याला आणि हाताला गंभीर दुखापत झाली. त्याच्यासोबत असलेल्या दुसऱ्या युवकालाही करंट लागल्याची माहिती मिळाली असून त्याची जखम किरकोळ असल्याचे समजते.जखमी तेजनला तात्काळ ग्रामीण रुग्णालय, बल्लारपूर येथे हलविण्यात आले. तेथे प्राथमिक उपचार करून त्याला पुढील उपचारासाठी शहरातील एका खाजगी रुग्णालयात दाखल करण्यात आले आहे.या घटनेनंतर परिसरात काही काळ भीतीचे वातावरण निर्माण झाले. शहरातील अनेक भागांत विद्युत खांबांवर, सार्वजनिक ठिकाणी आणि वाहतुकीस अडथळा निर्माण करणाऱ्या ठिकाणी मोठ्या प्रमाणात लावण्यात येणारे बॅनर, पोस्टर, फलक यांच्यावरील सुरक्षेअभावी उद्भवणाऱ्या धोक्याबाबत पुन्हा चर्चा सुरू झाली आहे.दरम्यान, निवडणूक काळात शहरातील अनेक ठिकाणी परवानगीशिवाय आणि विद्युत खांबांवर बॅनर लावणे हा आचारसंहितेचा स्पष्ट भंग असल्याचे नागरिकांचे म्हणणे आहे. अशा प्रकारांवर प्रशासनाने कारवाई न केल्यामुळेच अशा अपघातांना आमंत्रण मिळत असल्याची टीका होत आहे.दरम्यान पोलीस स्टेशन येथे या घटनेची नोंद झाली असून पुढील तपास सुरू आहे.
