काचनगाव शाळा व्यवस्थापन समितीच्या अध्यक्षपदी पुन्हा सतिश कापसे यांची निवड
काचनगाव | तालुका प्रतिनिधी : सुनील हिंगे (अल्लीपूर)
हिंगणघाट तालुक्यातील काचनगाव येथील जिल्हा परिषद शाळेच्या शाळा व्यवस्थापन समितीची निवड प्रक्रिया खेळीमेळीच्या व एकमताच्या वातावरणात पार पडली. शासनाच्या शाळा व्यवस्थापन समितीबाबतच्या मार्गदर्शक तत्त्वे व नियमांनुसार ही निवड पालकसभेतून करण्यात आली.
गेल्या दोन वर्षांत शाळेचा चेहरामोहरा बदलण्यासाठी महत्त्वपूर्ण योगदान देणारे, शाळेत लोकसहभाग वाढविणारे तसेच विविध माध्यमांतून निधी उपलब्ध करून अनेक सुविधा कार्यान्वित करण्यासाठी सातत्याने प्रयत्नशील असलेले विद्यमान अध्यक्ष सतिश कापसे यांची पुन्हा एकदा शाळा व्यवस्थापन समितीच्या अध्यक्षपदी एकमताने निवड करण्यात आली. उपाध्यक्षपदी सीमा कुंभारे यांची निवड करण्यात आली आहे.
पालक प्रतिनिधी म्हणून समितीतील विविध घटकांचा समतोल राखत सदस्यांची निवड करण्यात आली. यामध्ये योगेश माहुरे, राजेश भलमे, पवन खोंड, सोनू कापसे, प्रिया आदमने, सोनू गोटे व मंगला आत्राम यांचा समावेश आहे. शिक्षणतज्ज्ञ म्हणून साहिल खोडे यांची एकमताने निवड करण्यात आली असून विद्यार्थ्यांची गुणवत्ता सुधारण्यासाठी त्यांचा सकारात्मक दृष्टिकोन लक्षात घेऊन त्यांचे नाव सुचविण्यात आले. विद्यार्थी प्रतिनिधी म्हणून सार्थक कांबळे व अलविरा पठाण या दोन विद्यार्थ्यांची निवड करण्यात आली आहे.
मुख्याध्यापक सुनील कुरटकर यांनी समितीचे सचिव म्हणून काम पाहिले. ही बैठक मावळते अध्यक्ष सतिश कापसे यांच्या अध्यक्षतेखाली पार पडली. बैठकीस पालक मोठ्या संख्येने उपस्थित होते.नवीन शाळा व्यवस्थापन समितीच्या माध्यमातून शाळेची शैक्षणिक गुणवत्ता वाढेल, विद्यार्थ्यांचा सर्वांगीण विकास साधला जाईल, शालेय उपक्रमांची प्रभावी अंमलबजावणी होईल तसेच पालक-शिक्षक-समाज यांच्यातील समन्वय अधिक दृढ होईल, अशी अपेक्षा व्यक्त करण्यात येत आहे. या निवडीबद्दल नवनियुक्त पदाधिकारी व सदस्यांचे सर्व स्तरातून अभिनंदन होत आहे.
