बल्लारपूर नगर परिषदेच्या उपाध्यक्षपदी देवेंद्र आर्य यांची निवड, चार स्वीकृत सदस्यांचीही निवड
शहर प्रतिनिधी नरेंद्र कांबळे बल्लारपूर
बल्लारपूर : राजे बल्लाळशाह नाट्यगृहात गुरुवारी आयोजित विशेष बैठकीत काँग्रेसचे वरिष्ठ नेते देवेंद्र आर्य यांची सर्वसम्मतीने नगर परिषदेच्या उपाध्यक्षपदी निवड करण्यात आली. उपाध्यक्ष पदासाठी त्यांच्या विरोधात कोणतेही नामांकन दाखल न झाल्याने त्यांची बिनविरोध निवड घोषित करण्यात आली.
अलीकडे झालेल्या नगर परिषद सार्वत्रिक निवडणुकीत काँग्रेस पक्षाचे नगराध्यक्षपदासह १७ नगरसेवक विजयी झाल्याने परिषदेत काँग्रेसचे स्पष्ट बहुमत प्रस्थापित झाले आहे. सद्यस्थितीत भाजपचे ७, शिवसेना (उद्धव बाळासाहेब ठाकरे गट)चे ५, राष्ट्रवादी काँग्रेस (अजित पवार गट)चे ३, शिवसेना (एकनाथ शिंदे गट)चा १ तसेच १ अपक्ष नगरसेवक असे संख्याबळ आहे.
उल्लेखनीय आहे की २९ डिसेंबर रोजी नगराध्यक्ष डॉ. अलका अनिल वाढई यांनी पदभार स्वीकारला होता. त्यानंतर काँग्रेसकडून अब्दुल करीम शेख यांची गटनेतेपदी निवड करण्यात आली. गुरुवारी झालेल्या बैठकीत काँग्रेसचे माजी शहर अध्यक्ष देवेंद्र आर्य यांच्यावर उपाध्यक्षपदाची जबाबदारी सोपविण्यात आली.
याच बैठकीत नगर परिषदेच्या चार स्वीकृत सदस्यांचीही निवड करण्यात आली. काँग्रेसकडून डॉ. सुनील कुलदीवार व भास्कर माकोडे, भाजपकडून माजी नगराध्यक्ष व जिल्हाध्यक्ष हरीश शर्मा तसेच शिवसेना (उद्धव बाळासाहेब ठाकरे गट)कडून घनश्याम मूलचंदानी यांची स्वीकृत सदस्य म्हणून निवड झाली. काँग्रेसचे नरेश मुंदडा व नासिर खान यांनीही नामांकन दाखल केले होते; मात्र नासिर खान यांचे नामांकन नंतर बाद ठरविण्यात आले.
राजे बल्लाळशाह नाट्यगृहात पार पडलेल्या या विशेष बैठकीचे पीठासीन अधिकारी म्हणून नगराध्यक्ष डॉ. अलका अनिल वाढई यांनी काम पाहिले. मुख्याधिकारी विशाल वाघ यांनी संपूर्ण निवड प्रक्रिया पार पाडली. यावेळी उपमुख्याधिकारी संगीता उमरे यांच्यासह नगर परिषदेचे अधिकारी, कर्मचारी तसेच सर्व नवनिर्वाचित नगरसेवक उपस्थित होते.
उपाध्यक्षपदी निवड झाल्यानंतर देवेंद्र आर्य यांनी खासदार प्रतिभाताई धानोरकर, आमदार विजय वडेट्टीवार, काँग्रेस जिल्हाध्यक्ष सुभाष धोटे, नगराध्यक्ष डॉ. अलका वाढई, प्रभारी शहर अध्यक्ष अब्दुल करीम शेख यांच्यासह पक्षातील वरिष्ठ नेते व सर्व नगरसेवकांचे आभार मानले. बल्लारपूर शहराचा सर्वांगीण विकास, स्वच्छता, मूलभूत सुविधा आणि नागरिकांच्या समस्या सोडविण्यास प्राधान्य दिले जाईल, असे त्यांनी सांगितले.
निवडीच्या घोषणेनंतर समर्थकांमध्ये उत्साहाचे वातावरण होते. नगर परिषद परिसरात पेढे वाटून आनंद व्यक्त करण्यात आला. उपाध्यक्ष व नव्या स्वीकृत सदस्यांच्या निवडीमुळे नगर परिषदेच्या कामकाजाला नवी दिशा मिळेल आणि येत्या काळात बल्लारपूर शहरातील विकासकामांना गती मिळेल, असा विश्वास राजकीय वर्तुळातून व्यक्त करण्यात येत आहे.
