वर्धा पोलिसांची मोठी कामगिरी; आंतरराज्यीय चेन स्नॅचिंग टोळीचा पर्दाफाश

वर्धा पोलिसांची मोठी कामगिरी; आंतरराज्यीय चेन स्नॅचिंग टोळीचा पर्दाफाश

११ गुन्ह्यांचा उलगडा; २०.९० लाखांचा मुद्देमाल जप्त

वर्धा : जिल्हा विशेष प्रतिनिधी युसूफ पठाण 

वर्धा येथील स्थानिक गुन्हे शाखेने (LCB) तांत्रिक विश्लेषण व कृत्रिम बुद्धिमत्ता (AI) च्या मदतीने आंतरराज्यीय चेन स्नॅचिंग करणाऱ्या शातिर टोळीचा पर्दाफाश केला आहे. या टोळीने महाराष्ट्रासह मध्य प्रदेशातील अनेक जिल्ह्यांत गुन्हे करून दहशत निर्माण केली होती.

या कारवाईत पोलिसांनी एकूण ११ गुन्ह्यांचा उलगडा केला असून त्यामध्ये १० चेन स्नॅचिंग व १ दुचाकी चोरीचा समावेश आहे. सुमारे २० लाख ९० हजार रुपयांचा मुद्देमाल जप्त करण्यात आला आहे. यात १२६ ग्रॅम ३७० मिलीग्राम सोने, एक आयफोनसह दोन मोबाईल फोन आणि बजाज पल्सर दुचाकीचा समावेश आहे.

या प्रकरणातील मुख्य आरोपी हसनैन उर्फ हसन अली जाफर अली (वय २१, रा. भुसावल) याला अटक करण्यात आली असून त्याच्यावर महाराष्ट्र व मध्य प्रदेशात अनेक गुन्हे दाखल आहेत.

तपासाची दिशा आणि गुन्ह्याची पद्धत

पोलिसांनी वर्धा कंट्रोल रूमच्या मदतीने विविध ठिकाणांवरील सीसीटीव्ही फुटेज तपासले. कृत्रिम बुद्धिमत्ता (AI) तंत्रज्ञानाचा वापर करून धूसर फुटेजमधून आरोपीची ओळख पटवण्यात आली. आरोपीने जून २०२५ मध्ये भोपाल येथील चुनाभट्टी पोलीस ठाणे हद्दीतून चोरी केलेल्या पल्सर दुचाकीचा वापर सर्व चेन स्नॅचिंग गुन्ह्यांत केला होता.

तपासादरम्यान आरोपीची पत्नी सुखैना अली व बहीण सना अली या चोरीचे दागिने ग्वाल्हेर येथील ज्वेलर्सकडे गहाण ठेवण्यास मदत करत असल्याचे निष्पन्न झाले. दरम्यान, आतिश उर्फ सादिक इबादत अली हा दुसरा साथीदार अद्याप फरार असून त्याचा शोध सुरू आहे.

नोंद गुन्ह्यांचा तपशील

रामनगर (वर्धा) – ६ गुन्हे (२०२५ ते मार्च २०२६),

वर्धा शहर – १ गुन्हा, सावंगी (मेघे) – १ गुन्हा,

पुलगाव – २ गुन्हे (२०२४),

यवतमाळ (अवधूतवाडी) – १ गुन्हा,

मंडला (मध्य प्रदेश) – १ गुन्हा (फेब्रुवारी २०२६),

भोपाल (चुनाभट्टी) – १ गुन्हा (दुचाकी चोरी, जून २०२५).

पोलिस पथकाचे कौतुक

ही कारवाई जिल्हा पोलिस अधीक्षक सौरभ कुमार अग्रवाल व अतिरिक्त पोलिस अधीक्षक सदाशिव वाघमारे यांच्या मार्गदर्शनाखाली पोलिस निरीक्षक विनोद चौधरी व त्यांच्या एलसीबी तसेच सायबर पथकाने यशस्वीरीत्या पार पाडली.

विशेष : आरोपी हसन अली हा जळगाव जिल्ह्यातील पाच गंभीर गुन्ह्यांतही फरार होता. या कारवाईमुळे वर्ध्यासह इतर जिल्ह्यांतील अनेक गुन्ह्यांचा उलगडा झाला आहे.