रक्तदान हेच श्रेष्ठ दान; दिलीप कुमार फाउंडेशनतर्फे उद्या भव्य रक्तदान शिबिर
प्रतिनिधी अशोक इंगोले हिंगोली
हिंगोली : वसमत येथे हिंदी चित्रपटसृष्टीतील महान अभिनेते, पद्मभूषण स्व. दिलीप कुमार यांच्या पुण्यतिथीनिमित्त दिलीप कुमार फाउंडेशन यांच्या वतीने उद्या भव्य रक्तदान शिबिराचे आयोजन करण्यात आले आहे. सामाजिक बांधिलकी जपत गरजू रुग्णांना वेळेवर रक्त उपलब्ध व्हावे, तसेच समाजात रक्तदानाविषयी जनजागृती व्हावी या उद्देशाने हा उपक्रम राबविण्यात येत आहे.
रक्तदान हे सर्वश्रेष्ठ दान मानले जाते. एका रक्तदात्यामुळे अनेक रुग्णांचे प्राण वाचू शकतात. हीच भावना लक्षात घेऊन आयोजित करण्यात आलेल्या या शिबिरात युवक, सामाजिक कार्यकर्ते, विविध संस्था, व्यापारी, शासकीय कर्मचारी तसेच सर्वसामान्य नागरिकांनी मोठ्या संख्येने सहभागी व्हावे, असे आवाहन आयोजकांनी केले आहे.
शिबिरासाठी अनुभवी डॉक्टरांचे पथक, प्रशिक्षित रक्तपेढी कर्मचारी तसेच आवश्यक वैद्यकीय सुविधा उपलब्ध करून देण्यात येणार आहेत. रक्तदात्यांच्या आरोग्याची संपूर्ण तपासणी करून सुरक्षित पद्धतीने रक्तसंकलन करण्यात येणार असल्याची माहिती आयोजकांनी दिली.
स्व. दिलीप कुमार यांच्या स्मृतींना अभिवादन करण्याचा आणि समाजोपयोगी कार्यात योगदान देण्याचा हा एक उत्तम मार्ग असल्याचे मत अनेक नागरिकांनी व्यक्त केले आहे. अधिकाधिक नागरिकांनी रक्तदान करून या सामाजिक अभियानाला यशस्वी करावे, असे आवाहन दिलीप कुमार फाउंडेशनच्या वतीने करण्यात आले आहे.
